10 個朋友嚟到瑞典旅行，9 個半都話要想去 IKEA 行返轉。大家都好奇元祖店會有啲咩新奇貨品呢？同香港店又有咩分別？
我哋每次都會苦口婆心勸朋友仔：「 唔好浪費你哋寶貴嘅旅行時間去啦。」Stockholm 只得兩間分店，一南一北，由市中心出發來回搭車時間都 1 小時+。而且瑞典店有嘅香港都有，香港冇嘅瑞典係冇㗎！不過，眼見大家都咁堅持要去潮聖，攪到我哋都好有興趣睇吓香港嘅 IKEA 分店到底點嘅。
於是乎，今次放暑假返香港我哋就去咗 Mega Box 分店行咗個圈。一如所料，港版示範單位佈置風格更多樣化，貨品方面瑞典有嘅款香港都有，而且同一件貨品嘅花款選擇亦更多。有更多嘅係我哋見都未見過，例如我哋返到瑞典非常後悔冇買到嘅冰涼床墊同枕頭、食完晏去恰返陣嘅打工仔們、土地問題冇空間拍拖嘅煙韌小情人，同埋圖中呢枝啤酒！
我哋當然即刻派出特派記者阿伯身先士卒試一試呢枝國外 special 啦。據阿伯引述，呢枝宜家啤酒味道似溝咗水，並且帶酸，一句講曬：唔好飲👎🏻 。瑞典啤酒廠喺一眾歐洲啤酒面一向表現平庸，呢枝亦唔例外，果然如假包換瑞典出品 😂
#ikea #宜家家居
Search